Bizkaiko Foru Aldundia

https://www.ebizkaia.eus helbide elektronikoa da Bizkaiko Foru Aldundiaren egoitza elektronikoa, eta Foru Aldundiak herritarren eskura jartzen du internet bidez era guztietako kontsulta eta izapideak egiteko, betiere informaziorako sarbidean eta jardueren izapideetan segurtasun-berme guztiak egonda.

Tresna hauek behar dira egoitza elektronikoaren zerbitzuetara sartzeko:

• Doako nabigatzaile hauetako bat:
  • Internet Explorer 10 edo goragoko bertsio bat. 
  • Mozilla Forefox 29 edo goragoko bertsio bat.
  • Google Chrome 34 edo goragoko bertsio bat.
  • Microsoft Edge.
• Pdf fitxategiak ikusteko edozein programa (Adobe Reader XI. bertsioa, Foxit Reader, Free PDF Opener, Nitro PDF Reader, …). Google Chrome eta Mozilla Firefox nabigatzaileen azken bertsioetan ez da beharrezkoa instalatzea, PDFak ikusteko programa bat baitaukate integraturik.
• Ziurtagiri elektronikoen erabileraren ondoriozko beste konfigurazio batzuk.
• Gainera, egoitza elektronikoaren zerbitzu gehienetan, Bizkaiko Foru Aldundiak sinadura elektronikorako onetsitako sistemak erabili behar dira.

Nahi izanez gero, aukera duzu egoitza elektronikoan nabigatzeko erabiltzaile gisa alta eman beharrik gabe.

Zure identifikazio eta/edo autentifikazio elektronikoa behar duen izapide elektronikoren bat egin nahi duzun lehen aldiz eskatuko zaizu egoitzan alta eman dezazula, baina behin baino ez; horretarako, identifikazio eta komunikaziorako oinarrizko datuak eskatuko zaizkizu.

Bizkaiko Foru Aldundiaren egoitzara sartzeko hau egin behar duzu:

• Google Chrome edo Mozilla Firefox erabiliz, hemen sartu: https://www.ebizkaia.eus/eu/hasiera
• Eskuineko goiko ertzean, EREMU PRIBATUA dioen lekuan, klik egin Sarbidean.
• IDENTIFIKATU sakatu.
• Aukeratu zer identifikazio-sistema erabili nahi duzun:

B@K

B@KQ

Ziurtagiri digitalak

• Identifikatu ondoren, bete beharreko orri batera sartuko zara (helbidea, harremanetarako helbide elektronikoa...). Egoitza elektronikora sartzen zaren lehenengo aldian orri hori agertuko zaizu.
• Nahitaezko eremuak bete ondoren, BERRETSI sakatu.

Dagoeneko alta eman duzu Egoitza Elektronikoan.

Zure datuak NIRE PROFILA atalean kontsultatu ahal izango dituzu

Esteka honetan kontsultatu ditzakezu Bizkaiko Foru Aldundiak sinadura elektrikorako onetsitako sistemak: sinadura elektronikorako onetsitako sistemak.

Identifikazio-mota bakoitza segurtasun-maila bati lotuta dago.

• B@K: Identifikaziorako eta sinadura elektronikorako doako sistema bat da, baxu-mailako segurtasunarekin. Pertsona fisikoentzat baino ez da.

IZENPE ziurtatze-entitateak eman eta kudeatzen du, eta, emateko, EZ da behar aurrez aurreko identifikazioa. 

Bere emisioa aktibazio-kode baten bitartez hasiko da; kode hori behin bakarrik erabil daiteke, eta eskaria on-line egin daiteke. Aktibazio-kodea duen gutunak zure helbidera bidaliko zaizu.

Identifikazio hori erabili bazenuen alta emateko baina ez baduzu zure pasahitza gogoratzen, sakatu «Pasahitza ahaztu al zaizu?», eta automatikoki bidaliko dizute zure helbide elektronikora.

• B@KQ-k segurtasun maila ertaina dauka. B@KQ bulego hauetako batera bertaratuz eska dezakezu:
  • KZgunea  zentroak
  • Zuzeneanen bulegoak
  • Osakidetzaren osasun-zentroak
  • Izenpe
  • Baina IZENPEren herritarren ziurtagiria baduzu edo NAN elektronikoa baduzu, on line, bertaratu gabe, eska dezakezu zure B@kQ: on line eskaerak.
  • Herritarren laguntzeko BFAren bulegoak

Ziurtagiri elektroniko aitortua; segurtasun-maila handia dauka (NAN elektronikoa, Izenperen ziurtagiria...). Egoitza elektronikoaren esteka honetan, onartzen diren identifikazio-sistemei buruzko informazioa lor dezakezu: https://www.ebizkaia.eus/eu/onetsitako-sinadura-sistemak

Ziurtagiri elektroniko aitortua ziurtapen-zerbitzuen emaile batek modu elektronikoan sinatutako agiri bat da, sinadura egiaztatzeko datuak sinatzaile batekin lotzen dituena eta haren identitatea berresten duena. Elektronikoki sinatzeko beharrezkoa den informazioa biltzen du, bai eta ziurtagiriaren jabea identifikatzekoa ere: izena edo sozietatearen izena, NANa edo IFZa, algoritmoa eta sinatzeko gakoak, iraungitze-data eta ziurtagiria ematen duen erakundea. Ziurtagiri elektronikoak, beraz, balio du pertsona, fisiko, juridiko edo entitateak identifikatzeko eta, era berean, pertsona edo erakunde horiek dokumentuak elektronikoki sinatzen dituztenean hauek bermatzeko:

• sinatzailearen identitatea, inolako zalantzarik gabe.
• sinaturiko dokumentuaren osotasuna, hau da, sinaturiko dokumentua jatorrizko agiri bera dela eta ez duela inolako aldaketa edo manipulaziorik izan.
• sinaturiko dokumentuari ez zaiola ukorik egingo, sinatzaileak sinatzeko erabiltzen dituen datuak bakarrak eta esklusiboak baitira, eta, beraz, ezin du esan, gero, dokumentu hori sinatu ez duenik.

Ziurtagiri elektronikoetan bi tipologia daude:

• Hardware motako ziurtagiri elektroniko aitortuak: txartel bat dute oinarri, txip kriptografiko bat txertatuta daramana, eta ziurtagiria irakurri ahal izateko beharrezkoa da erakunde bidaltzaileak emandako softwarea ordenagailuan instalatuta izatea eta txartela bera irakurgailu batean sartzea.
• Software motako ziurtagiri elektroniko aitortuak: ziurtagiriaren erakunde jaulkitzaileak emandako software batean oinarritzen dira. Ez dute inolako elementu fisikorik behar (txartela, tokena…).

Ziurtagiri elektroniko bat aitortua da baldin eta ziurtagiria eman duen ziurtapen-zerbitzuen emaileak sinadura elektronikoari buruzko legedian ezarritako betekizunak betetzen baditu, dela ziurtagiria ematen zaion pertsona fisikoa edo juridikoaren nortasuna eta gainerako inguruabarrak egiaztatzeari dagokionez, dela ematen dituen ziurtapen-zerbitzuen fidagarritasunari eta bermeei dagokienez. Ziurtagiri aitortuak ematen dituzten zerbitzu-emaileak erakunde eskudunak ezarrita eta gainbegiratuta daude, eta ziurtapen-zerbitzuen emaileen konfiantzazko zerrendan (TSL) agertzen dira, administrazio publiko guztiek onartu behar dituzte ziurtagiri horiek.

Ziurtagiri elektroniko aitortua lortzeko, ziurtagiria igorri duen erakundera jo behar da eta Bizkaiko Foru Aldundiak onarturiko ziurtagirietako bat eskatu. Beherago duzun estekan dituzu bai Bizkaiko Foru Aldundiak onartzen dituen ziurtagiri elektroniko aitortuen zerrenda, bai ziurtapen-erakundeen webetarako estekak. Bizkaiko Foru Aldundiak onartzen dituen ziurtagiri elektroniko aitortuen zerrenda.

Egoitza elektronikora sartzen diren prozedura, izapide eta zerbitzuetan, jarduera hauek egin ahali izango dira: eskabideak, idazkiak eta komunikazioak aurkeztu, espedienteen izapideen egoerari buruzko kontsultak egin eta jakinarazpen elektronikoetara sartu.

Gaur egun egoitza elektronikoan dauden prozedura, izapide eta zerbitzuetara sartzeko, jo izapideen katalogoaren bilatzaile aurreratura, eta aukeratu "izapidetzeko kanala: elektronikoa; non izapidetu: egoitza elektronikoa".

Horrez gainera, aukera dago Bizkaiko Foru Aldundiak emandako dokumentuen benetakotasuna eta osotasuna egiaztatzeko eta beste jarduera batzuk egiteko, fisikoki pertsonatu beharrik gabe.

Beharrezkoa da Bizkaiko Foru Aldundiak sinadura elektronikorako onetsitako sistema bat izatea.

Gaur egun egoitza elektronikoan dauden prozedura, izapide eta zerbitzuetara sartzeko, izapideen katalogoaren bilatzaile aurreratura jo behar duzu, eta "izapidetzeko kanala: elektronikoa; non izapidetu: egoitza elektronikoa" aukeratu.

Egoitza elektronikoaren izapideen katalogoan aurkituko duzu prozedura, izapide eta zerbitzu bakoitzari buruzko informazio zehatza. Katalogoan, alderdi hauei buruzko argibideak izango dituzu: eskabideak aurkezteko epeak, prozedura eta izapideak ebazteko epeak, administrazio-isiltasunaren ondorioak, jar daitezkeen errekurtsoak, aurkeztu beharreko dokumentazioa...  Horrez gainera, izapide elektronikoa egiteko formularioak eskuratu ahal izango dituzu.

Bai. Erregistro elektronikoak frogagiri elektroniko bat emango du automatikoki, idazkia edo eskabidea eta erantsitako dokumentuak aurkeztu direla ziurtatzeko. Informazio hau izango duzu frogagirian: sarrera-erregistroaren zenbakia edo kodea eta aurkezpenaren eguna eta ordua, bidaltzailearen identitatea, kasuan kasuko prozedura, formularioaren izena edo gaia, aurkezpen-formularioan sartutako datuak (hitzez hitz) eta dagokion egiaztapen-kodea (hari esker, aukera izango duzu frogagiria kontsultatzeko, ikusteko eta kopia elektroniko bat inprimatzeko).

Egoitza elektronikoko atal pertsonalizatu bat da, erabiltzaileari aukera ematen diona bere izapideak elektronikoki egiteko eta egoitza elektronikora sartzen doazen prozedura, izapide edo zerbitzuetan eginiko jardueren egoera kontsultatzeko. Horrez gainera, aukera ematen dio aurkeztutako dokumentazio guztira eta bere jakinarazpen zein komunikazioetara sartzeko. 

Egoitza elektronikoko prozedura, izapide edo zerbitzuen jakinarazpenak eta komunikazioak elektronikoki jaso nahi badituzu, erabiltzaile gisa jasota egon behar duzu egoitza elektronikoan, eta zure profilaren datuak beteta eduki behar dituzu. Horrez gainera, aurretik harpidetuta egon behar duzu jakinarazpen eta komunikazio elektronikoen zerbitzuan. Izapide hori modu elektronikoan egin dezakezu, egoitza elektronikoaren bidez, edo, bestela, erregistro-gaietan laguntzeko bulegoetara bertaratuta. Eskabidea bulegora bertaratuta eginez gero, harpidetza egiteko formularioa aurkeztu edo, hala bada, formulario horretan dauden akatsak zuzentzeko idazkia aurkeztu eta gehienez ere ondorengo 15 egun naturalen barruan gauzatuko da harpidetza.

Behin hori eginda, "nire jakinarazpen eta komunikazioak" atalean izango dituzu eskuragarri harpidetza egin eta hurrengo egunetik aurrera egiten dizkizuten jakinarazpen eta komunikazio guztiak, eta, identifikatu eta autentifikatu ondoren, haietara sartzeko aukera izango duzu.

Jakinarazpen edo komunikazioren bat eskuragarri duzun bakoitzean, mezu elektroniko bat jasoko duzu jakinarazpen edo komunikazio elektronikoen zerbitzuan harpidetzean eman d(it)uzun helbide elektroniko(et)an.

Helbide horiek aldatzeko, egoitza elektronikoko "Nire Datuak" atalera sartu behar duzu.

Egoitza elektronikora sartzen doazen prozedura, izapide edo zerbitzuetan, espedienteen izapideen egoera kontsultatu ahal izango da; horretarako, egoitza elektronikoko "nire izapideak" atalera jo behar da, norbera identifikatu eta autentifikatu ondoren. Atal horretan, aukera dago aurkeztutako dokumentazioa kontsultatzeko, eta jakinarazpen zein komunikazioak kontsultatu eta jasotzeko.

Egoitza elektronikoko prozedura, izapide edo zerbitzuren bat edo guztietan jakinarazpenak edo komunikazioak jasotzeari utzi nahi izanez gero, bi aukera dituzu:

• Bide elektronikoa erabilita: "nire harpidetzak jakinarazpen eta komunikazioetan" atalera sartu behar duzu eta indarreko harpidetza aldatu. Aldaketa egin eta hurrengo egunetik aurrera egiten diren jakinarazpen eta komunikazioak posta arruntaz bidaliko dira.
• Bulegora bertaratuta: Bizkaiko Foru Aldundiak erregistro-gaietan laguntzeko dituen bulegoetako edozeinetan harpidetzari baja emateko eskabidea aurkeztuta. Azken kasu horretan, baja emateko formularioa aurkeztu edo, hala bada, formulario horretan dauden akatsak zuzentzeko idazkia aurkeztu eta gehienez ere ondorengo 15 egun naturalen barruan gauzatuko da baja.

Egoitza elektronikoaren ziurtagiri bidez identifikatuko dira egoitza elektronikoak.

Egoitza elektronikoak modu fede-emailean identifikatzeko eta haiekin komunikazio segurua bermatzeko balio dute egoitza elektronikoaren ziurtagiriek; hala, eskaintzen den informazioaren pribatutasuna eta osotasuna ziurtatzen dira, eta beste batzuek asmo txarrez eginiko intrusioen biktima izateko arriskua saihesten da.

Egoitza elektronikoaren ziurtagiri aitortua, funtsean, web-zerbitzaria segurua dela ziurtatzen duen agiri bat da, konfiantzazko hirugarren gisa diharduen ziurtapen-zerbitzuen emaile batek ematen duena. Ziurtagiriak egoitza elektronikoaren titularraren identifikazioa jasotzen du, eta dispositibo seguru baten edo bide baliokide baten bidez igortzen da.

Bizkaiko Foru Aldundiaren egoitza elektronikoa sortzen duen 77/2012 Foru Dekretuan ezartzen da egoitza elektronikoak bere gutxieneko edukien artean ziurtagiriak egiaztatzeko sistema izan behar duela eta zuzenean eta doan sartu behar ahal izango dela sistema horretara.

Urrats hauek eman behar dituzu Bizkaiko Foru Aldundiaren egoitza elektronikoak emandako ziurtagiriaren balioa egiaztatzeko (zuzenean eta doan):

1. Egin klik zure nabigatzailearen helbide-barran, eta aukeratu "ikusi ziurtagiria". Nabigatzaile bakoitzak bere erara erakutsiko du ziurtagiria, baina beti jasoko du informazio bera.
2. Ziurtagiriaren edukia ikusi ahal izateko, egin klik "xehetasunak" atalean, eta aukeratu "subjektua" eremua.
3. Egin klik ziurtapen-bidean egiaztatzeko konfiantzazko zer erro-ziurtagiri erabili den egoitzako ziurtagiria igortzeko eta zer egoeratan dagoen ziurtagiria.
    

www.ebizkaia.eus Izenpe Gune Seguru bat da, balidazio hedatua duena. Hori esteka honetan egiazta dezakezu.

Zure eta egoitzaren arteko komunikazioa segurua da. Informazio guztia zifratuta geratzen da. Ziurtagiri elektronikoek alderdi bien identitatea bermatzen dute. Ematen dituzun izaera pertsonaleko datuak ere zifratuta daude, eta, gure sisteman gordetzen direnean, behar diren bideak erabiltzen ditugu babesteko, datuak babesteko lege organikoa eta hura garatzen duen araudia betez. 

Elektronikoki sortutako lokalizatzaile alfanumeriko bat da; dokumentu elektronikoetan txertatzen da dokumentu horien paperezko kopiak benetakoak direla eta balioa dutela egiaztatzeko; egiaztapen hori egiteko, jatorrizko dokumentu elektronikora sartu behar da, egoitza elektronikoaren barruko "dokumentuen egiaztapena lokalizatzailearen eta sinaduren bidez" atalean.

Bizkaiko Foru Aldundiaren egoitza elektronikoa erabiltzen duten organo eta erakunde publikoek elektronikoki sinatutako dokumentu elektronikoek egiaztapen-kode elektronikoa (EKEa) daukate ezkerraldean txertatuta.

Jarduera hauek egin ahal izango dituzu egoitza elektronikoaren barruko "dokumentuen egiaztapena; lokalizatzailearen eta sinaduren bidez" atalean EKEa sartuta:

• Dokumentua deskargatu eta, horrela, paperezko dokumentuaren benetakotasuna eta osotasuna egiaztatu deskargatutako dokumentuarekin alderatuta.
• Dokumentuari lotutako sinadurak egiaztatu; horretarako sinaduren zerrendara sartu behar duzu eta hala aukera izango duzu sinatzaileen identitatea, sinatzaileek zerbitzua ematen duten organoa eta sinadura mota egiaztatzeko, bai eta ziurtagiri edo zigilu elektronikoz eginiko sinadurak egiaztatzeko ere.
• "Sinaduren ziurtagiria" lortu. Ziurtagiri bat sortuko da PDF formatuan. Ziurtagiri horretan ez dira jasoko jatorrizko sinadura elektronikoak; dokumentu sinatuaren ertzean testu bat agertzen da sinatzaileen izena jasotzen duena. Beraz, ez du jatorriko dokumentuaren balio juridikoa.

Egoitza elektronikoak etengabe eskaintzen du bere zerbitzua, eguneko hogeita lau orduz, egun guztietan, eta erregistro elektronikoa ere une oro egongo da funtzionamendu osoan. Epeak zenbatzeko, erregistroak egoitza elektronikoaren egun eta ordu ofizialak hartuko ditu kontuan.

Esteka honetan kontsultatu daitezke interesdunek eta administrazio-organoek bete beharreko epeak zenbatzeko erregistro elektronikoak erabiliko dituen egun eta ordu ofizialak: Egun eta ordu ofizialak.

Egun baliogabe batean egiten den aurkezpena hurrengo egun balioduneko gaueko hamabiak eta segundo batean egindakotzat joko da, salbu eta araudi batek beren-beregi onartzen badu harrera egun baliogabe batean egitea.

Esteka honetan kontsultatu dezakezu Bizkaiko Foru Aldundiak onetsitako egun baliodunen egutegia: Egun baliogabeen egutegia.

Egun baliodun edo naturaletan ezarritako epea zenbatzeko, egun baliogabe batean egiten den aurkezpena hurrengo egun balioduneko gaueko hamabiak eta segundo batean egindakotzat joko da, salbu eta araudi batek beren-beregi onartzen badu harrera egun baliogabe batean egitea. 

Jakinarazpen elektroniko bat "nire jakinarazpenak" atalean eskuragarri duzunetik, egutegiko 10 egun dituzu irakurtzeko, prozedura arautzen duen araudian beste epea bat ezartzen ez bada. Zerga arloko foru araudiak araututako prozedurak izapidetzearen ondoriozko jakinarazpenen kasuan, berriz, epea egutegiko 20 egun izango da.

Epe horretan irakurtzen ez baduzu, jakinarazpena uko egindakotzat joko da, baina egindakotzat joko da lege-ondorio guztietarako, ofizioz edo jasotzaileak eskatuta egiaztatzen ez bada irakurtzeko ezintasun teknikoa edo materiala egon dela.